ಹರಿದಳು, ನೊರೆ ಮೊರೆದು, ಝರಿ ಇಳಿದು,

ಹಾರಿ ಬಿದ್ದು ಬಂದವಳು;

ಪ್ರಶಾಂತ ಸಮಸ್ಥರದಲ್ಲಿ ಸ್ಥಾಯಿಯಂತೆ,

ಧಾವಂತವಿಲ್ಲದವಳು.

ಕಳೆದ ಏರು-ಪೇರುಗಳ ನೆನಪಿಲ್ಲದೆ,

ಇಹದ ಚಿಂತೆಯಿಲ್ಲದವಳು;

ಮುಂದಿನ ಹೊಲಸು-ನೋವುಗಳ ಅರಿವಿಲ್ಲದೆ,

ಪರದ ಗೊಂದಲವಿಲ್ಲದವಳು.

ಪಟಿಕ-ಶುದ್ಧ ಉದ್ಬುದ್ಧಳಾಗಿ ಬಂದು-

ಪವಿತ್ರ ನೀರೆಯಾದವಳು;

ಪಾಪ-ಪುಣ್ಯಗಳಾಚೆಯೆಲ್ಲವ ತೊಳೆದು-

ಪಾವಿತ್ರ್ಯದ ಪ್ರತೀಕವಾದವಳು.

ರಾಮ-ಲಕ್ಷ್ಮಣರ ಹೆಸರ ಹಿಡಿದ-

ತೂಗುಯ್ಯಾಲೆ ತೂಗುವವಳು,

ಗುಹನ ಪುಟ್ಟ ತೆಪ್ಪ ತೇಲಿಸಿ ದಾಟಿಸಿ,

ನಿರೀಕ್ಷೆಗಳ ಮೀರಿದವಳು.

ಹಚ್ಚಿ ಬಿಟ್ಟ ಪುಟ್ಟ ಪುಟ್ಟ ಹಣತೆಗಳಲಿ-

ಭರವಸೆಗಳ ಬೆಳಗುವವಳು;

ಹಾದಿಯುದ್ದ ಹರಿದುಹೋದ ಸೆರಗಂಚಲಿ-

ವಿಶ್ವಾಸದ ಸೆಲೆ ಹರಿಸುವವಳು.