Monday, 04 September 2006 04:46 PM

ಉಗ್ರರ ವಿಮಾನ ಸ್ಫೋಟ ಸಂಚು ವಿಫಲ

ಲಂಡನ್: ಲಂಡನ್‌ನಿಂದ ಅಮೇರಿಕಕ್ಕೆ ತೆರಳುವ ಸುಮಾರು ೧೦ ವಿಮಾನಗಳನ್ನು ಹಾರಾಟದ ಸಮಯದಲ್ಲೇ ಸ್ಫೋಟಿಸುವ ಅಲ್-ಖಾಯಿದಾ ಉಗ್ರರ ಸಂಚನ್ನು ಲಂಡನ್ ಪೊಲೀಸರು ಚಾಣಾಕ್ಷತನದಿಂದ ವಿಫಲಗೊಳಿಸಿ ಬೃಹತ್ ಸಾವು-ನೋವುಗಳನ್ನು ತಪ್ಪಿಸಿದ್ದಾರೆ.

ಅಮೇರಿಕಾ ವಿಶ್ವ ವ್ಯಾಪಾರ ಕೇಂದ್ರದ ಮೇಲೆ ನಡೆಸಿದ ದಾಳಿಗಿಂತ ತೀವ್ರ ಸ್ವರೂಪದ ದಾಳಿ ಇದಾಗಲಿತ್ತು ಎಂದು ಲಂಡನ್ ಪೊಲೀಸರು ಹೇಳಿದ್ದಾರೆ. ಪ್ರಾಥಮಿಕ ವರದಿಯ ಪ್ರಕಾರ ಈ ಕೃತ್ಯವನ್ನು ಅಲ್ ಖಾಯಿದಾ ರೂಪಿಸಿತ್ತು.

ದ್ರವಾಧಾರಿತ ಸ್ಫೋಟಕಗಳನ್ನು ಬಳಸಿ ವಿಮಾನವನ್ನು ಸ್ಫೋಟಿಸುವ ಮೂಲಕ ಹಲವು ಮಂದಿಯನ್ನು ಬಲಿ ತೆಗೆದುಕೊಳ್ಳುವುದು ಉಗ್ರರ ಲೆಕ್ಕಾಚಾರವಾಗಿತ್ತು. ಆದರೆ ಪೊಲೀಸರ ಸಕಾಲಿಕ ಕಾರ್ಯಚರಣೆಯಿಂದಾಗಿ ಈ ಪ್ರಯತ್ನ ವಿಫಲವಾಗಿದೆ ಎಂದು ಬ್ರಿಟನ್ ಗೃಹಕಾರ್ಯದರ್ಶಿ ಜಾನ್ ರೀಡ್ ಹೇಳಿದ್ದಾರೆ.

ಉಗ್ರರ ಸಂಚು ಬಹಿರಂಗಗೊಂಡ ಮರುಕ್ಷಣ ಲಂಡನ್ ಮತ್ತು ಅಮೇರಿಕಾ ಮಧ್ಯದ ವಿಮಾನಯಾನಗಳನ್ನು ರದ್ದುಗೊಳಿಸಲಾಯಿತು. ಅಮೇರಿಕ, ಲಂಡನ್, ಯುರೋಪಿನ ದೇಶಗಳು ಈ ಕೃತ್ಯವನ್ನು ಗಂಭೀರವಾಗಿ ಪರಿಗಣಿಸಿದ್ದು, ವಿಮಾನ ನಿಲ್ದಾಣಗಳಲ್ಲಿ ಬಿಗಿ ಬಂದೋಬಸ್ತ್ ಕೈಗೊಳ್ಳಲಾಗಿದೆ. ದಾಳಿಯನ್ನು ಕಾರ್ಯರೂಪಕ್ಕೆ ತರಲು ಸಜ್ಜಾಗಿದ್ದ ೨೧ ಉಗ್ರರನ್ನು ಬಂಧಿಸಲಾಗಿದೆ.

Print this page

ಮುಖಪುಟ

Email : feedback@vikrantakarnataka.com