ಬೆಂಗಳೂರಿನಲ್ಲಿ ೨,೧೧೨ ಕ್ಕೂ ಅಧಿಕ ಎಕರೆ ಭೂ ಒತ್ತುವರಿ

ಬೆಂಗಳೂರು: ಬೆಂಗಳೂರಿನ ಎಂಟಕ್ಕೂ ಅಧಿಕ ಬಡಾವಣೆಗಳಲ್ಲಿ ಸಾವಿರಾರು ಎಕರೆ ಭೂಮಿ ಒತ್ತುವರಿಯಾಗಿರುವುದು ಕಂಡುಬಂದಿದೆ. ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರದ ಪ್ರಕಾರ ಇದರ ಅಂದಾಜು ಮೊತ್ತ ೪,೪೦೭ ಕೋಟಿಗೂ ಅಧಿಕವಾಗಲಿದೆ. ಇದೆ ಬೆಲೆಯನ್ನು ಮಾರುಕಟ್ಟೆಯ ಇಂದಿನ ದರದ ಪ್ರಕಾರ ಲೆಕ್ಕ ಹಾಕಿದರೆ ೧೦,೦೦೦ ಕೋಟಿಯನ್ನು ಮೀರುತ್ತದೆ.

ಬನ್ನೇರುಘಟ್ಟ ರಸ್ತೆ ಬಳಿಯ ಎನ್‌ಎಸ್ ಪಾಳ್ಯ ಕೊಳೆಚೇರಿ, ಬೇಗೂರು ಹೋಬಳಿಯ ಏಳುಕುಂಟೆ(ಹೆಚ್‌ಎಸ್‌ಆರ್ ಬಡಾವಣೆ ಬಳಿ)ಗ್ರಾಮ, ಉತ್ತರಹಳ್ಳಿ ಬಳಿಯ ಕೊತ್ತನೂರು, ಯಡಿಯೂರು, ನಾಗಸಂದ್ರ ಇವು ಈಗ ಬೆಳಕಿಗೆ ಬಂದಿರುವ ಕೆಲವು ಪ್ರದೇಶಗಳಾಗಿವೆ.

ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ ತನ್ನ ವರದಿಯನ್ನು ಎ.ಟಿ ರಾಮಸ್ವಾಮಿ ನೇತೃತ್ವದ ಶಾಸನ ಸಮಿತಿಗೆ ಸಲ್ಲಿಸಿದೆ. ಸಮಿತಿಯ ಸದಸ್ಯರಾದ ಮಾಜಿ ಸಚಿವ ರೋಷನ್ ಬೇಗ್ ಹಾಗೂ ಸದಸ್ಯರಾದ ಎಸ್ ರಘು, ಎಂ. ಬಿ. ಮುನಿವೆಂಕಟಪ್ಪ ನಗರದ ಎಂಟು ಬಡಾವಣೆಯಲ್ಲಿ ಬುಧುವಾರ ಸಮೀಕ್ಷೆ ನಡೆಸಿದರು.

ಸರ್ಕಾರಕ್ಕೆ ಸಲ್ಲಿಸಿರುವ ವರದಿಯ ಮುಖ್ಯಾಂಶ:

• ಒತ್ತುವರಿ ಸಂಬಂಧಿತ ಮೊಕದ್ದಮೆಗಳನ್ನು ಒಂದು ವಿಭಾಗೀಯ ಪೀಠಕ್ಕೆ ವರ್ಗಾಯಿಸುವುದು.

• ಪ್ರತ್ಯೇಕ ಕೋರ್ಟ್ ಸ್ಥಾಪಿಸಿ ಒತ್ತುವರಿಯ ಕೇಸುಗಳನ್ನು ಶೀಘ್ರವಾಗಿ ಇತ್ಯರ್ಥಗೊಳಿಸುವುದು.

• ಸರ್ಕಾರಿ ಭೂಮಿಗಳ ನಿರ್ವಾಹಣೆಗಾಗಿ ೨೦೦ ಕ್ಕೂ ಅಧಿಕ ಜನರನ್ನು ನೇಮಕ ಮಾಡುವುದು.