Downloads

Wallpapers

Vikrantakarnataka Weekly

Thursday, 30 November 2006 02:43 PM

ಪತ್ರಕರ್ತನ ಮೇಲೆ ಹಲ್ಲೆಮಾಡಿದ ಚೆನ್ನಿಗಪ್ಪ

ಮೈಸೂರು: ಜೆಡಿಸ್ ನಾಯಕರೂ, ಅರಣ್ಯ ಸಚಿವರೂ ಆದ ಚೆನ್ನಿಗಪ್ಪ ಮತ್ತು ಅವರ ಚಾಲಕ ಇಬ್ಬರೂ ಸೇರಿ ಕರ್ತವ್ಯ ನಿರತ ಪತ್ರಕರ್ತರೊಬ್ಬರ ಮೇಲೆ ಹಲ್ಲೆ ನಡೆಸಿ ಕ್ಯಾಮೆರಾವನ್ನು ಕಿತ್ತು ಕೊಂಡಿರುವ ಘಟನೆ ನಡೆದಿದೆ.

ಹಿನ್ನೆಲೆ: ಚಾಮುಂಡಿ ಬೆಟ್ಟದ ಹತ್ತಿರದ ಹಡಜನ ಕ್ರಾಸ್ ಬಳಿ ೧೨ ಕಾರುಗಳಲ್ಲಿ ತಮ್ಮ ಬೆಂಬಲಿಗರೊಂದಿಗೆ ಬರುತ್ತಿದ್ದ ಸಚಿವ ಚೆನ್ನಿಗಪ್ಪರನ್ನು ಚುನಾವಣಾ ವೀಕ್ಷಕರು ಈ ಕಾರುಗಳಿಗೆ ಪ್ರಚಾರದ ಅನುಮತಿ ಇಲ್ಲದ ಕಾರಣ ತಡೆದು ನಿಲ್ಲಿಸಿದರು. ಚುನಾವಣಾ ವೀಕ್ಷಕರಿಗೆ ಚೆನ್ನಿಗಪ್ಪ ಕೈ ಮುಗಿಯುತ್ತ `ನಿಯಮ ಉಲ್ಲಂಘಿಸಿದ್ದರೆ ದಯವಿಟ್ಟು ಕ್ಷಮಿಸಿ' ಎಂದರು.

ಸ್ಥಳದಲ್ಲಿದ್ದ `ಮೈಸೂರು ಮಿತ್ರ' ಪತ್ರಿಕೆಯ ವರದಿಗಾರ ಈ ದೃಶ್ಯವನ್ನು ಸೆರೆ ಹಿಡಿಯುತ್ತಿದ್ದಂತೆಯೇ ಚೆನ್ನಿಗಪ್ಪ ಆಕ್ರೋಶದಿಂದ `ಹಿಡ್ಕೊಳ್ರಿ..ಆ..ಮಗನ್ನ' ಎಂದು ತಮ್ಮ ಆಪ್ತ ಸಿಬ್ಬಂದಿಗಳಿಗೆ ಆಜ್ಞಾಪಿಸಿದರು. ಚೆನ್ನಿಗಪ್ಪ ಅವರ ಸಿಬ್ಬಂದಿಗಳು ವರದಿಗಾರನ್ನು ಎಳೆದುಕೊಂಡು ಹೋಗುವಾಗ ವರದಿಗಾರನಿಗೆ ಅನೇಕ ತರಚು ಗಾಯಗಳಾಗಿವೆ. ತನ್ನ ಕ್ಯಾಮೆರಾ ಮರಳಿ ನೀಡುವಂತೆ ವರದಿಗಾರ ಕೇಳಿಕೊಂಡರೂ ಮರಳಿಸಲಿಲ್ಲ.

ದೇವೇಗೌಡ ಕ್ಷಮೆಯಾಚನೆ: ಜೆಡಿಸ್ ವಕ್ತಾರ ವೈ.ಎಸ್.ವಿ. ದತ್ತಾ ಪತ್ರಿಕಾಗೋಷ್ಠಿ ಕರೆದು ಚೆನ್ನಿಗಪ್ಪ ಅವರ ನಡುವಳಿಕೆಯನ್ನು ಸಮರ್ಥಿಸಲು ಪ್ರಯತ್ನಿಸಿದಾಗ ದೊಡ್ಡ ಕೋಲಾಹಲವೇ ನಡೆಯಿತು. ಮುಖ್ಯಮಂತ್ರಿಗಳು ಕ್ರಮ ಕೈಗೊಳ್ಳುವಂತೆ ಪತ್ರಕರ್ತರು ಒತ್ತಾಯಿಸಿದರು. ಜೆಡಿಎಸ್ ರಾಷ್ಟ್ರಾಧ್ಯಕ್ಷ ದೇವೇಗೌಡ ಪತ್ರಕರ್ತರನ್ನು ಕ್ಷಮೆಯಾಚಿಸಿದ್ದಾರೆ. ಈ ನಡುವೆ ಚೆನ್ನಿಗಪ್ಪ `ಮೈಸೂರು ಮಿತ್ರ' ಪತ್ರಿಕೆಯ ಸಂಪಾದಕರನ್ನು ಭೇಟಿಯಾಗಿ ಸಂಧಾನಕ್ಕೆ ಯತ್ನಿಸಿದ್ದಾರೆ.

ಇನ್ನಷ್ಟು

Print this page

Email this Page

ಮುಖಪುಟ