ಇದ್ದದನ್ನು ಇದ್ದಂಗೇ ಹೇಳಿದ್ರೆ ಎದ್ದು ಬಂದು ಎದೆಗೇ ಒದ್ರಂತೆ! ವಿಮರ್ಶೆ ಯಾರಿಗೆ ತಾನೆ ಇಷ್ಟವಾಗುತ್ತೆ ಹೇಳಿ? ಎಲ್ರಿಗೂ ಬೇಕಾಗಿರೋದು `ಭಲರೇ ಶಹಭಾಸ್'.

ತೆರೆಮೇಲೆ ಪ್ರಬುದ್ಧವಾಗಿ ಕಾಣಿಸಿಕೊಳ್ಳೋ ಕಲಾವಿದರು ಪ್ರಶಂಸೆ-ಟೀಕೆಗಳನ್ನು ಎದುರಿಸುವಾಗಲೂ ಅದ್ಯಾಕೆ ಪ್ರಬುದ್ಧವಾಗಿ ವರ್ತಿಸೋದಿಲ್ಲ ಎನ್ನುವ ಪ್ರಶ್ನೆ ಹುಟ್ಟಿಕೊಂಡದ್ದು ಕಳೆದ ಶನಿವಾರ `ಸೈನೈಡ್' ನಿರ್ದೇಶಕ ರಮೇಶ್ ಹಾಗೂ ನಟಿ ಮಾಳವಿಕಾ ಜತೆ `ಈ ಟಿವಿ' ಏರ್ಪಡಿಸಿದ್ದ ನೇರ ಫೋನ್-ಇನ್ ಸಂವಾದದ ಸಂದರ್ಭದಲ್ಲಿ.

ತಮ್ಮ ಪಾತ್ರ ನಿರ್ವಹಣೆಯ ಬಗ್ಗೆ ಪ್ರಶಂಸೆಯ ಮಾತುಗಳು ಬಂದಾಗ ಅಷ್ಟಗಲ ಮುಖ ಮಾಡಿ ನಗುತ್ತಿದ್ದ ಮಾಳವಿಕಾ, ಅದೇ ಸ್ವಲ್ಪಹೊತ್ತಿನ ಬಳಿಕ ಪ್ರೇಕ್ಷಕರು ಆಕೆಯ ನೆಗೆಟಿವ್ ಪಾಯಿಂಟುಗಳನ್ನು ಎತ್ತಿತೋರಿಸಹತ್ತಿದಾಗ ಮಾತ್ರ ಕೆಂಡಾಮಂಡಲವಾದರು.

`ಮಾಳವಿಕಾ ನಟನೆಯೇನೋ ಓಕೆ. ಆದರೆ ಅವರಿನ್ನೂ `ಮುಕ್ತಾ'ದ ಹ್ಯಾಂಗೋವರ್‌ನಿಂದ ಹೊರಬಂದಿಲ್ಲ. ಸೈನೈಡ್‌ನಲ್ಲೂ ಅದೇಕೋ ಮಾಧವಿ ಪಟೇಲೇ ಕಾಣಿಸ್ತಿದ್ಳು' ಅಂತ ಪ್ರೇಕ್ಷಕರೊಬ್ಬರು ಬೊಟ್ಟು ಮಾಡುತ್ತಿದ್ದರೆ, ಮಾಳವಿಕಾ ಮೇಡಂ ಫುಲ್ ಅಪ್ಸೆಟ್! `ನೀವು ಆ ಥರಾ ಹೇಳೋದು ಸರಿಯಲ್ಲ. ನಾನು ಅಪಾರ ಶ್ರಮವಹಿಸಿ ಆ ಪಾತ್ರ ಮಾಡಿದ್ದೀನಿ' ಎಂಬಿತ್ಯಾದಿ ಸ್ಪಷ್ಟೀಕರಣಗಳಿಗೆ ಜೋತು ಬೀಳತೊಡಗಿದರು ಮಾಳವಿಕಾ.

`ಮಾಳವಿಕಾ ನಟನೆ ಬಗ್ಗೆ ನೋ ಕಾಮೆಂಟ್ಸ್. ಆದ್ರೆ ಆ ಪಾತ್ರಕ್ಕೆ ಅವ್ರು ಏನೇನೂ ಸೂಟ್ ಆಗ್ತಿರಲಿಲ್ಲ' ಅಂತ ಇನ್ನೊಬ್ಬರು ಹೇಳುತ್ತಿರಬೇಕಾದರೆ ಮೇಡಂ ಪೆಚ್ಚು ಮೋರೆ ಹಾಕಿ ಕುಳಿತಿದ್ದರು.